Oscars

Leave a comment

Y l’otru día nos oscars, dixeramos que ganara En Tierra Hostil a Avatar. Pal min ver, inxustamente.

Otres inxusticies nos oscars:

-El compositor Ennio Morricone, nunca na vida ganó un Oscar, y ameritó pa ello: La Triloxía del Dolar, la Triloxía d’Érase una Vez, la Misión…etc. Nel 2006 recibió un óscar honoríficu, pero eso nun val.

-El gran Stanley Kubrick, filmó La Chaqueta Metálica, Barry Lyndon, A Clockwork Orange, Una Odisea nel Espaciu, Espartaco, Teléfono Rojo/Volamos hacia Moscú, El Resplandor, Senderos de Gloria y Atraco Perfecto, pero nunca recibió un óscar. Eso sí, Una Odisea nel Espaciu recibiolu a los meyores efectos especiales.

-Alfred Hitchcock, que ganó sólo un premiu en memoria d’Irving Thalberg, pesie a facer pelicules como Psicósis, La ventana indiscreta, Sospecha, La soga, El hombre que sabía demasiado, Los pájaros o Crimen Perfecto.

Pero esto’tis Hollywood y na industria del cine, les coses furrulen asina.

oscars.jpg

Ocalitos

Leave a comment

eucalipto.jpg

 

Pensatible… plasmáu… silenciosu

como’l pitu a la vista del raposu

cuando menos barrunta, quietu, atentu,

nun perdí nin migaya del to cuentu.

 

(Teodoro Cuesta, Andalucía y Asturies, Ed. Trabe, Uvieu 2000 )

 

Versos qu’escribiera allá pel sieglu XIX el poeta, ¿quién? Como non, Tiadoru.

Aproximadamente, per esa dómina, na que fo escritu esti pleitu con Diego Terrero (1870-1881) foi introducíu n’Asturies -o eso diz dalgún- l’ocalitu, esi collaciu del nuesu paisax llariegu. Concretamente, la fazaña foi llevada a cabo -nun sé si foi con noturnidá y alevosía, como dixera’l mafiosu Jesús Gil daquella vegada- nel conceyu Sotu’l Barcu. Heriede daquellos vieyos ocalitos ta, como non, l’ocalitón de Somáu, nel vecín conceyu de Pravia, de xuru arimáu a la finca del que los llantó.

Aquel día, el que fixo la poza y lu espetó, quedó agusto. Agora, yo nun sé si lo fixeren a querer o-ys salió mal la xugada, pero’l casu’tis que, mamina, qu’exitu tuvieron…

Alón Don Miguel

Leave a comment

Morréu Miguel Delibes yá, esti día. Tenía cerca los 90, touvo una vida llarga.

Pa min fora ún de los meyores novelistas en castellanu, sinon de tolos tiempos, de lo que you conozo. Tenía un mirar agudu, entendía mui bien la psicoloxía popular, ya cuando escribía, facíalo dende la perspectiva de los probes, de la xente más probe del mundu rural de Castiella. Esti autor sí soupo dar un mirar universal dende’l mundu rural… mui bon.

Y una cosa tamién me prestaba d’él: Fou a la lliteratura en castellán lo que pue ser daquién qu’escribe nuna variante local del asturianu. Miguel Delibes facíalo col falar de Valladolid. Tenía mui bon gustu al hora d’escribir cumo fala la xente, la xente de la parte’l Pisuerga.

Yía cousa fácil que salgan escritores en castellán, sí, pero agora ¿Hailos tantos bonos qu’escriban nun dialeutu local? Home sí, claro, haber habrá, pero igual non tanto pa Castiella.

De Delibes teo lleío un pouco de todo, ya dalgún títulu espero llier: El Camino, Cinco Horas con Mario, El Disputado Voto del Señor Cayo, Los Santos Inocentes, Castilla, lo Castellano y los Castellanos. Ya prometo llier bien lluego El Hereje, ganas teo.

Ya de tola esbilla que feixe, recomiendo tolos títulos. Nellos, faise un repasu a la España de provincias, de Castiella, qu’avanza, daquella manera, un progresu davezu mal entendíu ou mal trayíu, que provoca ruptura ente la España más atrasada ya la España del desarrollismu, ya llou actual. Castiella, la natura ya’l mundu los cazadores, aquel progresu ou desarrollismu, aquella Castiella vieya… (Anque los Santos Inocentres trescurre n’Estremadura). You siempre remembraréi a la mia profesora de Lengua y Literatura nel Institutu aquella frase de que nos tiempos de menor llibertá xurde una meyor lliteratura, desgraciadamente. Pa min que Delibes garróu camín col Franquismu…’til esta selmana.

Don Miguel, que la tierra-y sía lleve, ya non diría alón,yá qu’inda queda la sua obra.

El Nuevu Cine de la Guerra (d’Iraq)

1 comentariu

Yo les coses d’almugada hai que les dexar en casa. O si prefier ún, les coses de matrimoniu, esa santa institución que, ensin dexar de ser puru negociu -ente dos partes; l’home y la muyer; la muyer y l’home meyor dichu- constituín ún de los pegoyos, non sólo de la nuesa sociedá, sinon seique del ser humanu.

Porque los seres humanos querémonos. O queremos dalgo. O a daquién. Del sexu contrariu, tamién del nuesu, y inclusive animales. Exemplos habelos hailos y nun vienen a cuentu.

Poro, d’esta gala última de los premios Oscars, del cine norteamericanu chocóme muncho, muncho, muncho que llegaren a la puya’l premiu -val hom, yá sé que nun hebo puya, que fo competitividá puro y duro- la pareya Kathryn Bigelow (ella) y James Cameron (él), dos direutores de cine que nun sé si se quixeron muncho o sólo teníen puru interés especulativu; pero’l casu’tis que tuvieron casaos, allá polos años 90 del sieglu XX.

Esto vien’cause debió tar guapa la competición ente ex-muyer y ex-maríu; si los garren los de la prensa’l corazón… ellí en norteamérica son Celebrities.



Y ganó ella (Kathryn Bigelow). La so película, “En Tierra Hostil”, ganó a “Avatar” (la del ex, James Cameron).

La peli va de la guerra d’Iraq, un puntu que se dedica a desactivar bombes y explosivos que, en fin, habéis mirala. Dame que xugó la baza de la emotividá. Y salió-y reondu.

Personalmente, creo que’twas muncho meyor el cine bélicu que ficieron de la II Guerra Mundial o de la Guerra del Vietnam. Especialmente remembra la situación d’esa dómina de los Estaos Xuntos. Pero de momento, nun hai nenguna peli’bout Iraq como Apocalipsis Now, La Chaqueta Metálica o Platoon.

Y dame que nun la va haber…

Al riscar….

Leave a comment

El sol al riscar, por George Harrison, nel sou homenax, a esti home que nacéu casi el miesmu día que you, pero 41 años antias.  A la sua memoria.

Emisión en Pruebas

Leave a comment

¡Probando, Probando! Faciéndome a Nireblog…