Welcome to Asturies, Viḷḷamanín de la Tercia

Anda la vecería too esprecetao per Viḷḷamanín de la Tercia, ehí xunto a Ḷḷena, pero pal otru llau, yá en tierres de Llión.

Y dicíame un amigu, qu’él encantáu, asina cuando fora mercar pan de lo bono, d’eso de lleña que tan bien lo faen, nun diba salir d’Asturies. Y yo, tamién, asina cuando fora a Viḷḷamanín, nun diba tampoco salir d’Asturies.

El casu ye que la xente del pueblu o lo que sía aquello, anden a la griesca col alcalde (pa eso lu votaren, pa tar en griesca continua, sinon nun sacaba mayoría absoluta) porque nun-ys punxeron unes lluces de nadal, y eso, queráis que non, jode muncho. Llueo nin vien Papa Noel nin los Trés Reis Magos. Ye más, los asturianos Príncipe d’Aliatar nun xube, porque eso nun pertenez siquiera a Asturies, y l’Anguleru, tampoco, porque ta llonxe de L’Arena. Nin siquier xube ehí nin L’Esteru nin El Pandigueiro, pero eso dos sí que nun-ys da muncho más, porque ún ye mediu cántabru y l’otru mediu gallegu…

Y bono, votaron al so alcalde del PP, pero porque asina pasan pa col de Ḷḷena, que ye d’Izquierda Xunida, y si votaran en Viḷḷamanín a un puntu d’Izquierda Xunida ¿cómo diben agora pidir ser asturianos, sí yá teníen alcalde coloráu?

Eso sí, ai non, si son asturianos, entós diben llamase non Villamanín de la Tercia, sinon Viḷḷamanín, o Viḷḷamanín de Ḷḷena, o del Puertu p’aḷḷa o dalgo asina… Que-ys quede claro…

Sicasí, siemrpe dixi que lo primero que tenía, dientro d’una espiral espansiva, facer el Principáu yera entrar a sangre y fueu na Islla La Deva, el Peñón de la playa Bayas, ehí pa Castrillón. Había que llantar una guardería (un puestu guardamontes) y poner un practicante del SESPA. Asina ési diba ser el conceyu 79 del Principáu; llueo yá miraríamos ver pal Sur. Pero lo primero, la Islla la Deva (bono, o peñón o lo que sía).

A Asturies fai falta tener el so particular Peñón de Xibraltar, y ehí na Deva hai un fermosu de xuru. Darréu d’ési, Viḷḷamanín, sacante que nesti casu ye la xente -seique coyunturalmente, seique como mal menor- que prefiera ser asturiano nantes qu’otra cosa.

Si ye asina, bienllegaos.

(Ai cómo se nota que nun nos conocen bien…)

Cristina Fernández llama mongolón a Cameron

Cristina Fernández de Kirtchner acaba llamar “mongolón” a Cameron, el premier británicu. Bono, a ver, lo que lu llamó foi “Mediocre”, pero cuando un arxentín diz “sos mediocre” ye como cuando daquién de la Zona Ruraliega Occidental del País diz “Sos una mongolona”. Vaiga ehí la torna al asturllionés dende l’español rioplatense.

Non ho. Los arxentinos -y seilo por ser descendiente d’ún- adoren a los británicos. Bono, pa los que nun sían de la Zona Ruraliega esplicaréivos:

-Un arxentín ye daquién que tien dellos buelos italianos, gallegos y/o criollos y un/a buelu/a asturianu/a. Esto ye, ye daquién que ye dalgo asturianu, pero que tien acentín como italianu y fala español. Y caprichosón y llorón como un gallegu. Sí un amagüestu guapu. Ah, y piensen que les Islles Malvines-ys pertenecen, pero la llegalidá internacional diz-ys “Taivos ehí quietos”.

-Británicos hai munchos. Per un llau tán los Ingleses, que son un poco como los d’Uvieo o Avilés -seique Xixón, bono tamién- y si son de pueblu, de La Pola Siero. Británicos son tamién los Galeses, que son un poco como la xente del Eo-Navia, mui paecía a los ingleses pero que falan más rarín que, en fin, naide los entiende, y lo que fala paezse a lo de los bretones, que como pal casu de los gallegos, colo d’ellos. Pero unos son británicos y otros del contienente, cuidáu…. Y finalmente Irlandeses y Escoceses, que son la xente de la Zona Ruraliega, d’un llau y del otru. Ah, por cierto, a los Ingleses lo mesmo-ys da, pero como perdienon cola Arxentina un mundial, y son necios como los asturianos, pues entós creanon la llegalidá internacional, y achuquinanon a los arxentinos nel añu 1982 del Nuesu Señor, qu’en paz estea.

Buó, pero escaecí dicivos que los arxentinos -que tienen un buelu/a asturianu/a que ye como tener un buelu británicu- aspiren (surniar non, aspirar de tener aspiraciones) a ser como los británicos y los asturianos. Ai probinos que poco nos conocen en realidá… sólo d’oyíes.

Conque depués de la guerra, Les Islles Malvines (o Falkands) siguen calteniendose en manes britániques, como’l Peñón “¡Ai que peñón yes!” (que dicimos per esta fastera).

Yo Xibraltar, qué queréis que vos diga…. Bon, dicir que los ingleses cuando localizanon el mapa Asturies al principiu non, pero lluego tamién en As Figueiras quixenon llantar el so Xibraltar del Norte… pero nun foi. Pero agora que yá lo albidro, cá, nun diba prestar dir camín de Castripol y atopar una colonia ehí británica, cola bandera de so graciosa maxestá… 

Ehí la hestoria tevo ún de los sos capítulos más chocantes. Too escomencipió cuando Napoleón invade prehiquí too y los asturianos dicen “Non ho, vamos echalu, a ver ho a quién llamamos entós…” y fonon camín d’Inglaterra con una embaxada, y los ingleses (normal) flipanon, y lo primero que ficienon foi buscar un mapamundi pa llograr situar Asturies, y cuando lo vienon dixenon “¿Pero aquello ta esploráu? Equí nun puen nada, eso nun ta ensin descubrir según los nuesos mapes…” Y los asturianos.. “Non ho. Mira ho, si tenemos parllamentu y too… y si eso fadremos hasta un Calatrava y un Niemeyer y un Muselón pa qu’aparquéis los barcos” y los ingleses vinienon, y llueo -cunta la hestoria llariega- que nun quixenon marchar “Ei pero si tamos nes Islles, esto ta verde, bébese n’abondo y numái hai paso pente los puertos, eso ye como Gran Bretaña… coño ho, ¿nun ye aquello que sona una gaita?”

Bono, pues eso entós. Arxentinos, Británicos -nes sos diverses espresiones: ingleses, escoceses, galeses… y con ellos especialmente irlandeses- y asturianos somos bastante paecíos y bastante diferentes.

Poro, esta selmana, na Xunta Xeneral, los populares y los socialistes repartienon la presidencia de la Xunta Xeneral: toa pal PP; porque nesti casu, PP, PSOE y FAC (Francisco Álvarez-Cascos) son lo mesmo, y entós naide nun sal perdendo. Yá quixera yo ver como-y daben la presidencia a IX-LV o si toviera ehí -tarán pa otra- a BA-UNA.

Propuengo pa otra escribir FAC con acentín na A, de xeitu que quede FÁC, que asina someya más a Francisco Álvarez Cascos, que pa ello ye’l so partíu.

Revilluca Go Home!!!

Entós foi que l’otru día Don Revilla, como l’ Sporting diba baxar, dixo ¡Racing empata! y va’l Racing y empata, y l’ Sporting va y queda na primera división.

Y en Cantabria, van entós los del Uvieo y dicen “Ésti nun nos gusta, que ye un esquirol, que ye del Sporting” y van los cántabros y ponen a un puntu del PP, que ye como si punxeren al Coco o al Papón, y entós Revilluca, por fororu y por Sportinguista, a la puta cái.

Pero bono, l’ Sporting salvó, y el Racing tamién, anque por chungos, pal añu que vien, lleven milenta papeletes va baxar a segunda.

Porque Lendoiro, que ye del Depor, ofendiose, y dixo ¡Merda! 

Lendoiro tien carnet del PP, el dixo a Cascos que nun lu siguía, porque nun lu emocionaben los sos discursos. Normal. Lendoiro tien cara monxina, y Cascos non.

Bono, el casu ye que como nun baxó l’ Sporting -que ye un equipu de los cazurros de Llión- nin baxó’l Racing, entós baxa’l Depor. 

¡Gallegos y Asturianos Primos Hermanos!

Pero ¡ai amigu! El gran vencedor foi Manolo Preciado y l’ Sporting, porque’l Depor, baxó. Ai, eso yá lo dixera.

---

 

A Revilla nunca nun lu pudi nin ver. Ye que yera sentilu falar prehí pela tele y prender la catadora, a ver si callaba. ¡Ai que dolor de cabeza!

• Nunca nun lu pudi ver porque yera amigu de la nobleza, falaba de la Duquesa d’Alba, cómo si falara d’una custión d’estáu, que lo yera, pero pa desamortizala, non pa tenela ehí de guapa.
• Nunca nun lu pudi ver porque yera amigu de Carlos Osoro, l’anterior Arzobispu d’Uvieo, el mesmu que dixo nel funeral del Padre Fierro-Botas ¡callái y nun digáis nin res n’asturianu! Y el mesmu qu’acoricaba cola nobleza asturiana, pero non col pueblu.
• Nunca nun lu pudi ver por venir a rir les gracies al Maizón, de la que venía premiar a Uvieo.
• Nunca nun lu pudi ver cuando dicía coses como “Con cuatro como Botín, nun fain falta políticos” Nunca me prestó Botín.
• Nunca nun lu pudi ver cuando facía populismu baratu de chigre sobre madreñes.
• Nunca nun lu pudi ver, non. Y de magar…

 Por deschapletáu y combayón…

 

Eso sí, siempre me prestó cómo cantaba…

Burgos

¿Quén sería el primeiro asturiano que salíu d’Asturias? Eu nun lo séin, peró touvo que, al chegar a Castela, levar un bon susto.

Cousa estraña, a nosa autonomía vecía del sur. Castela y León, formada por Castela y por León.

Xa dicía Ortega y Gasset qu’eran pa cousas -as autonomías- propias. Por exemplo pr’as cousas nosas, a lingua, as nosas institucióis, a nuesa educación, sanidá, servicios… etc, de xeito máis descentralizado, peró al chegar al sur nun é asina.

Y é alí, en Castela y León únde se volve al modelo centralista. Y ben, eu sein  qu’hai autonomías y autonomías, mais nun é el caso que nos ocupa, unde os leoneses y os burgaleses, os sorianos, os salmantinos tán enfrentaos conos vallisoletanos; y non por vallisoletanos; senon pol sou xeito centralego.

 Mala cousa é aquela. 

Y malo é el rapaz novo; el da asociación pola libertá lingüística ou daqué asina. Nun me gusta nin miga, y nun m’inspira a súa libertá lingüistica. Nun é el concepto de libertá que, por exemplo precisa Asturias, el noso país (sí, sí, el noso país). Mala cousa.

Mala cousa y a mía solidaridá pra con León, pra con Burgos y pra con Zamora, Palencia, Salamanca, Segovia, Ávila e Soria. Y pra con Valladolid tamén; y que Dios yes teña na Súa Gloria. 

Vean dende os minutos dez hasta máis ou menos corenta. A canal xa lo din todo; é a autonómica de Castela y León, privada -como non- y d’úa calidá muito pior qu’a asturiana TPA, por maís qu’á TPA ye falten contenidos nesta lingua…

IDEAS, la Joint Venture del PRC

Juan Morales ye’l candidatu del PRC a les elecciones autonómiques asturianes esti añu 2011. Nun principiu, la cosa escomencipió asina: 

1. Taba nel PP
2. Marchó del PP
3. Fundó IDEAS.Ficieron una campaña ú gastaron bien de cuartos
4. Cascos, que yera amiguín, salío del PP y fundó’l so partíu “Francisco Álvarez-Cascos” o FAC na so abreviatura
5. Como gastaron cuartos y Cascos yá nun taba nel PP, ¿Qué facer?
6. Apaez l’espíritu de Paco Martínez Soria reencarnáu en Revilla, yá asuntu concluyíu: xuntamos con ésti otru.

 

Bono, y claro ho, como Revilla agora escribe llibros nos que cunta la so autobiografía, ye un valor seguru, como showman. Pero qué queréis que vos diga, nun ye que sía fan de Cascos, d’Álvarez-Cascos, pero tampoco Revilla me presta.

Revilla, talu que Cascos, son políticos amigos del gran capital y la nobleza, pa ésos miren y eso-ys quieren ellos. ¿Y pa la clase trabayadora y los paraos? Nada hom, esos puxarra.

Esos sí, Revilla gasta -dacuando- madreñes, canta’l Paxarín Parlleru, y fala n’asturianu, pero non, nun ta pol llabor de más nada, de normalizar la llingua. Cascos por supuestísimu que tampoco.

Del verde qué dicir. Sí, sélo, vamos bien colos que tamos, pero Revilla tien afán por esfarrapar lo que pueda, él taba pol AVE a Cantabria al preciu que fora, teo miéu que fora más bravu ehí que’l propiu Cascos, que bono, a ésti precede-y la fama.  Son xente a la que’l campu y lo verde, nun digamos nada de sostenibilidá, nun-ys da miga más.

IDEAS, prehí non ho.

Agora dicen qu’Asturies nun sé qué de la identidá hestórica común con Cantabria y Lleón pa facer una plataforma política conxunta. Home la plataforma facer, pue facese…

Pero siéntolo, nun hai tala identidá común ente Asturies, Cantabria y Lleón, por más que tengamos dalgunos puntos en común, problemes o rasgos puntuales que, en nengún de los casos Revilla va solucionanos.

Por exemplu, sí tenemos con Lleón la llingua asturllionesa, sí, que nestos días tán ellí por defender ente 11 asociaciones, pero Llión ye otru país, hermanáu val, pero con otres característiques y otra identidá hestórica, otra realidá, por más que sí, tengamos coses comunes, otres somos talamente estremaos.

¿Y colos cántabros? Siéntolo por dalgún compatriota, que quier espander Asturies hasta Bizkaia, pero con Cantabria compartimos la mar y el verde. Bono, y el bolu palma, pero a partir d’ehí poco más tenemos que ver. Nunca sentí a un cántabru falar gallegu -que yía una llingua que compartimos Asturianos y lleoneses, por más que nos-y digamos gallego-asturianu o fala o eonaviegu, pero que sabemos ye lo mesmu; pero eso ¿ú se fala en Cantabria? [Y non, nun val dicir nel Centru Asturianu, Galego, Leonés o similar, nin consulaos de Brasil o Pertual]. Ye más, ¿falan asturianu, lleonés o asturllionés? Non, non, non, non. Voces danles, y glayen somiáu, pero yá-ys pesa Castilla, como ellos dicen: llioneses y asturianos dicimos Castela o Castiella.

Los cántabros tienen el so mar Cantábricu, tenemos problemes comunes, como contaminación nél, o los problemes que tien el sector pesqueru; tenemos el sector llácteu, tamién cola so particular crisis. Ehí sí nos damos un oldéu. Amás ehí, danse los ocalitos de cine, meyor que pa Lleón. Pero pienso que más nada, o’l mesmu qu’ente otros países de la contorna. Con Lleón, amás compartimos a Vitorino.

Tenemos coses semeyaes y coses nes que nun nos paecemos. Y más si garramos ente Llión y Cantabria. Ellos dos tienen la so rellación de vieyo con Castiella, pero equí los asturianos -unvío un saludu a tolos castellanos- nun tenemos aquella rellación. Llión y Cantabria nel imaxinariu asturianu folclóricu y grandonón son “cazurros” sí, unos de mar y los otros non, y poro, a nós dícennos -tamién a gallegos- “Farrucos“, y yá solo a nós coritos.

Colos cántabros y colos llioneses xúntennos pa lo que-ys convién; pero nun nos van xuntar pa lo qu’a nós quixéramos o seique, de verdá nos convenía, conque, pela mio parte, yo nun voi sofitar, axudar, nin simpatizar con ésta idega, nin col PRC nin con IDEAS. Amás, que si quieren xuntar con Asturies, tienen que dexar de torear, qu’a nós eso bramente nun nos presta, y sé qu’a ellos, sí. Que too se sabe…

Hai dalgún asturianu qu’anda detrás d’un anschluss, atropando espaciu vital, pero pa esparder as súas zarapayadías, nun tien más aquel, nun trai cuenta dicir tampoco muncho más.

Polo demás, un saludu a Cántabros y Lleoneses; cuido que, xunto colos gallegos, son los meyores vecinos y hermanos que podemos tener… ¡o a lo meyor ye que como son los que nos tocaron nun conocemos nada meyor!

Herramientas sí, pero ferramienta n’asturḷḷeonés

Yá l’outru día me dixera un amigu falando con él: “¿Cúmo yía eso de “ferrramientas”? Tu que sos d’aldea, amás, ¿pero eso dizse?”

Ya tenía verdá. Recapituléi, ya non, yá remembro al miou buelu ou a los vieyos diendo buscar ferramienta pa con qué, pa dir trabayar prehí.

Sí, los mayores dicían ferramienta, ya paez ser que n’asturianu yía la forma correuta, asina en singular, bien pa un instrumentu ou bien pa muitos. Hai variantes dialectales cumo firramienta nel occidente ou ḥerramienta nel oriente; ferramenta dizse en gallego-asturiano.

Ya sí, outras formas hailas, arriendes. Vou cuntar un casu curiosu, con una tía mía, casteḷḷana, cuando you-y pidí al miou buelu que m’apurriera un preséu. Miou cuitada tía alzóu las manos “¡Cómo le pides eso a tu abuelu!”

Ya sí, nel fondu tenía razón -ya falo dende un presupuestu estríctamente ḷḷingüísticu- porque’l vieyín dicía “presea”, palabra que’l DGLA nun recuéi, pero qu’esiesti, dicíala miou buelu, que yera cumo un académicu, especialmente col emplego d’esti léxicu. El DGLA recuéi “Preséu” ya las suas variantes “prisíu” ya “presíu”.Ya sí apaez esta palabra nel diccionariu d’El Comercio de Sánchez Vicente.

L’emplego d’outra palabra, ya esta sí en plural, yia “arbía/s”, asina sí las teo sentío you pal pueblu’l miou pái. La miesma ALLA tien una coleición de material didácticu bramente interesante chamada “erbíes”, que yía la forma que garra l’asturianu más neutru, por asina lo dicir, de las palabras “arbías, erbías ya arabías”.

Too esto bien en relación con un actu que realizan pa Ḷḷión, un filandón, unde no cartel colóse-ys na palabra ferramientas. Los nuesos harmanos ḷḷingüísticos del Sur (ou d’en mediu, asegún s’amire) na sua fiesta nacional, el filandón, organizan unu pa San Román de la Vega, ya, poro, viénome a la memoria lo de ferramienta, una dulda que traía you na cabeza.

Deseando-ys muita suerte -quién fai las cousas de corazón sal yá de casa con eḷḷa- deixovos qu’apurráis la vuesa opinión al respective.

(Diccionarios consultaos: DALLA, DGLA, DASV [Diccionariu d’Asturiano de Sánchez  Vicente])

Cambeos na Bitácora

Bono, pos nada, que doi l’anuncia de que’l miou cuadernu dixital tien que dir p’allantre, cumo sía, que teo ganas de ver movimientu, ya entós, eso.

Asina que presento unas nuevas estaxas, un pouco asina cumo si foran dellos blogues dientro d’un sólo blogue. Porque yo soi asina, hai que ser arrogante.

Conque la cousa yía asina. Amestéi unas estaxas (ou estayes) que son:

El Filologuín Caleyeiru

¿Qué asturianu nun lleva un filólogu dientro? Yá lo dicia’l miou amigu Inaciu Galán nuna entrevista: tolos asturianistas llevan ún. El míu yía, amás, respondón.

Las duldas que tea (ou tean los veceiros) sedrán tratadas, pero nun prometo rigor. Eso sí, prestará. Que tamién yía importante.

Ello yera una vegada… Cine

Hmmm. Eiquí uso la frase: “Once Upon a Time…” que fora la que marcara la triloxía del miesmu nome del director italianu Sergio Leone, “Once upon a time (in America, in the west, in Mexico)”.

La mia sección de cine, en definitiva.

Lliteratura escrita con lletra grande

Qué sí, qu’a toos nos presta escribir ya lleer. Pero llibros con munchos debuxos ya lletra grande, que si non yía un rollu ya cansa la vista. Buó, pues ehí ta la sección lliteraria, pero nun viciéis… ya nun me faigáis dañu.

Alivántate Alifonsu, que vienen los alifantes

 Los asturianos, siempre mirando pal norte. Asturias yía una parte de la península ibérica que mira tradicionalmente pal norte… ya pon-y güeyinos ya carinas.. Pero tres los Montes Fimíssimos hai vida. 

A los asturianos (ya tamién a los gallegos) de la que vamos a provincias llamannos “Farrucos”, porque somos “insolentes, altaneros”. 

Nun lo saben bien. 

Pues vei dedicáu a los cazurros, cazurros castellanos ya madrilanos, cazurros de mar, ya de las suas cousas ya outras qu’asoceden na Península.

La frase yía tomada d’una espresión tradicional dee Palacios de Sil, nun significa nada, pero igual tien rellación con aquella outra: “Entresti cumo un elefante nuna cacharrería”.

A los cazurros tampouco-ys vei mal.

Hestorias del Mundu Ruraliegu

Ou cenciellamente Mundu Ruraliegu, sedrá la seición óu falaremos de socesos qu’ocurren n’Asturias, pa la faza rural, yía la versión llariega d’Alivantate Alifonsu que vienen, los alifantes. Bono, ou la outra yía la versión internacional d’ésta. Quién lo sabe, col mundu tan globalizáu…

 Teo miéu que sía la qu’a min más me preste…

Dalgunas seiciones yá funcionaban, pero yá van xorrecer; outras son nuevas. Ya momento estas nuevas seiciones, pero vendrán, vendrán más….