Una Caxa ye una institución del Sistema Financieru, que xunto colos bancos tercien ente les unidaes aforradores y les inversores. Esto ye, capten l’aforru y colóquen los cuartos en productos financieros pa los inversores, colo qu’obtienen una rentabilidá. Poro, constitúi una industria (o un negociu) como otru cualquiera, nel cual el xéneru ye’l dineru.
Sicasí, danse unes diferencies ente una caxa y un bancu (Y non, nun falo d’un escañu). Mentres qu’una caxa tien naturaleza xurídica d’entidá fundacional el bancu ye una sociedá mercantil, esto ye, tien una orientación capitalista (y privada) calteniendo una caxa una -cierta- orientación social (dacuando más teórica qu’otra cosa). Asina ye qu’un bancu xenera dividendos, metanes una caxa da como rendimientu la so obra social.
Arriendes d’ello, nos grupos de representación de les caxes hai corporaciones políticas locales (y autonómiques nel casu español o estatales nel alemán…etc.), d’impositores, entidaes fundacionales y d’emplegaos, mentres que nos bancos, como nes empreses capitalistes, sólo son representativos los accionistes.
Poro, una caxa ye dalgo mui golosu dientro del mundu la política, porque tien pesu les instituciones polítiques y tienen una clara vinculación territorial. Y, ensin escaecer que la nuesa ye una sociedá capitalista, ú n’última instancia una caxa furrula como un bancu, les caxes son una cosa que da muncho xuegu.
Y hasta ehí la teoría. Agora la mio opinión.
Nunca entenderé esta crisis. Pal casu español, dase una crisis financiera nun estáu ú la industria financiera -bancos privaos y dalgunes caxes- son bramente sólidos, y inclusive siguieron ganando cuartos cola crisis. Porque’l Bancu Santander, por poner un exemplu, siguió obteniendo beneficios, a pesar de qu’estos foron más baxos, pero siguió ganando y espandiendo los sos negocios per tol planeta.
Pero a lo que vamos. Centrando la cosa n’Asturies, equí CaxAstur, la Caxa d’Aforros d’Asturies va pagar los platos rotos del sistema. La nuesa yera una caxa pequeña, en cierta espansión y solvente. Bien afitada n’Asturies, taba abriendo oficines en Madril, nel Llevante, n’Andalucía y en Castiella. Tien abondes participaciones (Ence, Telecable, Indra, GAM, EdP -anque a costa de vender Hidrocantábrico, y inclusive Vodafone). CaxAstur organizaba bien d’eventos culturales n’Asturies, patrocinaba munches coses y víase la so presencia per ende siempre.
La cosa más o menos furrulaba, y entós el Gobiernu Español -col Banco d’España a la cabeza- premió a CaxAstur cediendo les cenices de Caja Castilla-La Mancha, que sirvió pa que’l Gobiernu d’esa autonomía (gobernada, por cierto, pol PSOE) gastara en fastos como l’aeropuertu de Ciudá Real o los fastos de la cellebración del aniversariu d’El Quijote, la obra lliteraria castellano-manchega por escelencia los cuartos d’esta caxa. Bono, y na especualación inmobiliaria nos ayuntamientos cercanos a Madril. Había que ver d’ú salieron los cuartos nos municipios más cercanos a Móstoles y Aranjuez que tán na provincia de Toledo.
El casu foi que, mentes n’Asturies PP y directivos de la Caxa d’Aforros llograron qu’Areces y la FSA nun manipulara la Caxa, en Castiella-La Mancha la CCM nun llevó la mesma suerte.
Primera llección: Si daqué furrula bien… ¿Por qué cambialo?
Y depués llegó la “fusión fría” ente les caxes d’Estremadura y Cantabria.
El casu ye que cola CCM -agora BCM, propiedá del Bancu Liberta, un bancu de naturaleza privada, perteneciente a CaxAstur, dirixíu al negociu d’empreses- CaxAstur metía un pie na metá sur d’España. Hai que dicir que CCM tenía una tamañu munchu mayor que CaxAstur, anque nun tenía la so solvencia:
Segunda llección: El tamañu nun siempre importa.
Y entós vieno la “fusión fría”, sí. Nunca supi muncho de física. Pero creo que la fusión fría d’esa que falen tanto quier ser integrar cuatro caxes: Caja Cantabria, Caja Extremadura, Caja Mediterraneo y Caxastur nun bancu priváu llamáu Banco Base.
Voilà. Acabáremos. Sí, les caxes tan venceyaes a unos territorios:
- Caja Cantabria a la antigua provincia de Santander, a Cantabria. Trátase d’una pequeña caxa, bien llantada na Comunidá Autonómica Vecina, y con dalgunes sucursales na vecina Castiella y Lleón y Madril, tien poca implantación fora, y nun tien munches participaciones capitalistes n’otres empreses non financieres, pero sí tien solvencia y una bona ufierta de productos financieros.Y desendolca una bona actividá social, hai que lo dicir.
- Caja Extremadura ye un poco más grande, igual, que Caja Cantabria; y tien más o menos les mesmes característiques que la cántabra.
- Caja Mediterraneo ye, dientro del grupu, el xigante de pies de barru. Venceyada territorialmente a Murcia y Alicante, tien una fuerte implantación nel llevante y sur peninsular; en Madril y una rede d’oficines qu’abarca tol mapa autonómicu español. Pero ye un desastre. Medró fuertemente con negocios venceyaos al lladriyu; amás d’ufrir servicios financieros, participaba nun negociu inmobiliariu, Mediterranean o dalgo asina. Vícitma de la crisis y un cierto desorden, tenía una rede d’oficines nel estranxeru y participaciones en dellos bancos privaos internacionales.
- Finalmente, CaxAstur, la nuesa, yera más pequeña que la CAM, pero tenía pesu nel centru d’España gracias a l’alquisición de CCM. Tratábase d’una caxa dedicada a la captación d’aforru de les families asturianes y a la creación y inversión d’empreses asturianes dafechu: Telecable, CAPSA, Hidrocantábrico… Yera la Caxa de los asturianos; col so asturcón como seña, yera’l so logo. Agora si privatizan CaxAstur y la convierten nun bancu priváu más… mal pasu p’Asturies, pasu p’atrás.
Personalmente, CaxAstur tien que siguir siendo sólo asturiana, y más asturiana aínda. Últimamente casi nun apaez per dayuri la firma CaxAstur, sinon sólo CajAstur. ¿Cómo ye eso? CaxAstur tien que tar más al serviciu d’Asturies, de los asturianos y del Gobiernu d’Asturies, anque ésti dacuando sía cafre, que lo ye, pero na midida de lo posible tien que ser siempre asina. Y, poro, el Gobiernu Asturianu nun tien que tratar d’esprimir a la Caxa pa les llocures faraóniques que tanto nos tien avezáu; equí trátase d’acudir a una economía de mercáu, pero non sólo a favor del mercader, sinon ú ganen (ganemos) toos: la Caxa, la xente, los asturianos y Asturies.
Asina que pela mio parte, la Caxa tien que siguir sola, trabayando nel saneamientu de Caja Castilla La Mancha, qu’agora ye una empresa asturiana localizada nesa parte, pero tien que tar saneada pol bien de los asturianos. Igual nun taba mal xuntar a Caja Cantabria y Caja Extramadura, o intentar facese col control d’elles, pero la sé d’esa empresa matriz tien de quedar n’Asturies. De nada val que tea en Madril o ú sía, entós si fumos quien tener una Caxa solvente bona, ¿pa qué agora sacala fuera?
-Tercera llección: CaxAstur ye una entidá asturiana y nun se mueve d’Asturies… a nun ser que sía pa facer negocios fora d’equí que traigan les plusvalíes p’Asturies, pa traer riqueza y trabayu (bono, y obra social sí). Y si non, antes qu’esa fusión capitalista y antiasturiana, que faigan a CaxAstur pública dafechu, propiedá de la Comunidá Autónoma del Principáu d’Asturies.